Logo deteylinger.nl
Foto:
Teylingen

‘Zoaterdag was ik in de buurte van mien wörtels’

Column • Vergangen zoaterdag was ik in de buurte van mien wörtels. As nee’m en nicht’n van mien va zien kaante harre we’j femiliedag. Dat bint er niet zoveule, we’j waar’n mit 7 man en vrouw. Da’s genog um ’t gezellig te hebb’n. De vrouw en ik hebt mit ’n beiden ok veule wille a’ we’j saa’m arns bint. ’t Zit ‘m niet in de kwantiteit moar in de kwaliteit, zegge we’j in Drente. Ei’gnlijk zegge we’j dat nooit - zukke woord’n bint te duur en te deftig veur oons. Dren’tn bint niet van veul woord’n en al hielemoale niet van dure woord’n. Doe moar gewoon – dan bint de mieste mènsen al gek genogt. Die h in de name huuft van oons ok niet, dat bint kuunstn. Schrief moar gewoon Drente. We’j waren be’j een nève den in Koevern woont mit zien vrouw. Oeze wörtels ligt doar net iets veur, arns in de buurte van Nijlaande. ‘t Dörp van al die onderduukers, messchien hè’j ’t op televisie eziene. ’t Dörp van Johannes Post. Doar woond’n ze eerder huus an huus, de Van der Weides. Mien oavergrootva hiette Van der Weide, moar zien vrouw, mien opoe, was òk ’n Van der Weide. En ze’j waarn gien femilie van mekaare. Da’s te zeggen – allent moar anetrouwd. A’j doar nog ies koomt, achter ’t Ogeviene, en ie sprèèkt doar een Eppe of een Oarnd van der Weide dan is dat wissenzèkers femilie van me’j. Moar is ’t een Albert of ’n Frèèrk, dan bint ze van de tak van Rooie Bartus. Die hebt allemoale wat rossigs in ’t hoar of in ’t gezichte. En die bint griffermeerd van huus uut. Mien femilie was hervörmd, en dat meuk hiel wat uut eerder. Mien moe was griffermeerd, en d’r was be’j heur volk gien dènken an dat ze’j ooit hervörmd zöl word’n. Dus wör mien va griffermeerd – den was niet zo meuilijk. Met de nee’m en nicht’n deu’n we’j zo’n femiliespellegie, mit van die vroag’n: wat is noe typisch veur oen femilie? We’j waar’n ’t er dik oaver iens: de Van der Weides bint niet meuilijk. Ze loat zich de kop niet gek maak’n. A’j ruzie mit oons zuukt mu’j wieder zuuk’n, zeg moar. We’j waar’n t oardig mit mekaare iens. Vol’nd joar bint ze hier. Alle zeu’m. Wees moar niet benauwd: we’j bint niet gevoarlijk…

eppevanderweide

Meer berichten